საზოგადოება ივერიისა ჩაერთო გელათის რეაბილიტაციის გრძელვადიან პროცესში. 2023 წლის 6 აპრილს საქართველოს საპატრიარქოსა და საქართველოს კულტურული მემკვიდრეობის დაცვის ეროვნულ სააგენტოს შორის ხელი მოეწერა ხელშეკრულებას, რითაც საქართველოს საპატრიარქო გახდა ხელმძღვანელი და მმართველი გელათის რეაბილიტაციისა. საქართველოს საპატრიარქო ტახტის მოსაყდრე, სენაკისა და ჩხორუწყუს მიტროპოლიტი შიოს (მუჯირი) მომართვის საფუძველზე, გელათის რეაბილიტაციის გრძელვადიან პროცესში საზოგადოება ივერიისას ეთხოვა უზრუნველყოს საზოგადოების ინფორმირებულობა და საგანმანათლებლო ღონისძიებების განხორციელება.

“საზოგადოება ივერიისამ”  დაიწყო ახალი პროექტი რომლის მიზანია წარმოვაჩინოთ  ის ისტორიული პიროვნებები, ვინც მნიშვნელოვანი როლი ითამაშა ჩვენი იდენტობის განსაზღვრაში. ამ პროექტის ნაწილია დოკუმენტური ფილმი: "ქეთევანი -დედოფლის დაბრუნება" რომელიც დედოფლის მოწამებრივი აღსასრულიდან 400 წლისთავს ეძღვნება.

საზოგადოება ივერიისას ფინანსური მხარდაჭერით მომზადდა და გამოიცა სამეცნიერო პუბლიკაცია „აფხაზეთი“, რომელშიც წარმოდგენილია საქართველოს ეროვნულ მუზეუმის ფონდებში დაცული აფხაზეთთან დაკავშირებული ნივთები. მეცნიერების მრავალი თაობის მიერ მოპოვებულ და შესწავლილ მდიდარ მასალას თავი მოუყარა და გამოსაცემად მოამზადა ხელოვნებათმცოდნეობის დოქტორმა, დინარა ვაჩნაძემ. ნაშრომის მიზანია აფხაზეთის უმნიშვნელოვანესი ისტორიულ-კულტურული ძეგლების წარმოჩენა და პოპულარიზაცია. აღსანიშნავია, რომ წიგნი სამენოვანია- ქართული, აფხაზური და ინგლისური.

ფასეულობათა კვლევის საზოგადოებისა  და “საზოგადოება ივერიისა”ს  თანამშრომლობით გამოიცა განახლებული "გული გონიერის" მეორე ნომერი (საღვთისმშობლო გამოცემა N 26/2024). ამ ნომერში არსებული სტატიების უმრავლესობა აშუქებს ქრისტიანულ თემატიკას, რომელიც ქართულ ლიტერატურაში, ხელოვნებასა და საქართველოს ისტორიაში გვხვდება.