„საზოგადოება ივერიისას"  მხარდაჭერით გამოიცა ისტორიის დოქტორისა და ხატმწერის, მაკა ჩხაიძის წიგნი „ქრისტეს მეგობრები". წიგნი, როგორც გამორჩეულ წმინდანთა ცხოვრების გზამკვლევი, ერთნაირად სასარგებლო იქნება როგორც პატარებისთვის, ასევე უფროსებისთვის.
 მართლმადიდებელ ეკლესიაში წმინდანთა თაყვანისცემის ტრადიციის ერთ-ერთი უმთავრესი საფუძველი მათ მიბაძვაში მდგომარეობს. წმინდანთა ცხოვრების გაცნობა ადამიანს პიროვნულ და სულიერ ზრდაში ეხმარება, ასევე საკუთარი იდენტობის გააზრებასა და სწორი მსოფლმხედველობრივი ორიენტირების ჩამოყალიბებაში უწყობს ხელს. 

„საზოგადოება ივერიისას" მთავარი მიზანი სწორედ ფასეულობებზე დაფუძნებული განათლების ხელშეწყობაა, ამიტომაც მივიღეთ გადაწყვეტილება, მხარი დაგვეჭირა ამ წიგნის გამოცემისთვის.

„საზოგადოება ივერიისას“ ინიციატივით და ფინანსური მხარდაჭერით გამოიცა წიგნი − „წმინდა ილარიონ ქართველი“. ნაშრომი მომზადდა კორნელი კეკელიძის სახელობის ხელნაწერთა ეროვნულ ცენტრთან თანამშრომლობით. წიგნში წარმოდგენილია ქართული მართლმადიდებელი ეკლესიის წმინდანის, ილარიონ ქართველის (IX ს.) „ცხოვრების“ ხუთი რედაქცია და მისდამი მიძღვნილი საგალობლები, რომლებიც წმინდანის გარდაცვალების დროიდან მოყოლებული XVIII საუკუნის ბოლომდეა შექმნილი, ასევე, კორნელი კეკელიძის სახელობის საქართველოს ხელნაწერთა ეროვნული ცენტრის მკვლევრის, მანანა დოლაქიძის 1974 წელს შესრულებული სამეცნიერო ნაშრომი ილარიონ ქართველის შესახებ.

“საზოგადოება ივერიისას“ თანადაფინანსებით გამოიცა მონოგრაფია „წმინდა მეომრები შუა საუკუნეების ქართულ ხელოვნებაში“.

წიგნი გიორგი ჩუბინაშვილის სახელობის ქართული ხელოვნების, ისტორიისა და ძეგლთა დაცვის ეროვნული კვლევითი ცენტრის მიერ განხორციელებული სამეცნიერო კვლევითი პროექტის ფარგლებში ჩატარებული სამწლიანი კვლევითი სამუშაოების შედეგია. ეს პროექტი განხორციელდა შოთა რუსთაველის საქართველოს ეროვნული სამეცნიერო ფონდის დაფინანსებით, ასევე, შვეიცარიის ეროვნული სამეცნიერო ფონდის (SNF), FARIG- ის და “საზოგადოება ივერიისას“ მხარდაჭერით.

მონოგრაფია მოგვითხრობს იმ დიდი წმინდა მეომრებზე, რომლებიც განსაკუთრებული პოპულარულობით სარგებლობდნენ შუა საუკუნეების საქართველოში. ცალკეული თავები ეთმობა წმ. გიორგის, წმ. დიმიტრის, წმ. თევდორე ტირონს/სტრატილატს და წმ. ევსტათე პლაკიდას.

„საზოგადოება ივერიისა“ მჭიდროდ თანამშრომლობს ჩვენი ქვეყნის წამყვან სამეცნიერო დაწესებულებებთან და საქართველოს ეროვნულ მუზეუმთან ჩვენი კულტურული მემკვიდრეობის დაცვისა და პოპულარიზაციის ხელშეწყობის მიმართულებით. 

„საზოგადოება ივერიისას“ და კორნელი კეკელიძის სახელობის საქართველოს ხელნაწერთა ეროვნულ ცენტრთან თანამშრომლობის ფარგლებში, 2024 წელს, ქართულ და ინგლისურ ენებზე, გამოიცა წიგნი „ქართული ხელნაწერი მემკვიდრეობა (V-XIX სს.)“. წიგნში წარმოდგენილია ხელნაწერთა ეროვნულ ცენტრში დაცული უნიკალური კოლექცია, რომელიც ასახავს ქართული ენისა და დამწერლობის ისტორიას, ქართველი ადამიანის სულიერი და ინტელექტუალური განვითარების ხანგრძლივ გზას, მხატვრული თუ მსოფლმხედველობრივი აზროვნების ჩამოყალიბების ეტაპებს. მკითხველი აქ გაეცნობა ქრისტიანული მწერლობის, მხატვრული ლიტერატურის თუ საისტორიო მწერლობის არაერთ უმნიშვნელოვანეს ძეგლს. ეს უნიკალურ მემკვიდრეობა არამარტო საქართველოს, არამედ მსოფლიოს მნიშვნელოვანი საგანძურია. 

საზოგადოების დიდი ინტერესიდან გამომდინარე, ჩვენს ვებ გვერდზე ხელმისაწვდომია წიგნის ელექტრონული ვერსია.

საზოგადოება ივერიისას ფინანსური მხარდაჭერით მომზადდა და გამოიცა სამეცნიერო პუბლიკაცია „აფხაზეთი“, რომელშიც წარმოდგენილია საქართველოს ეროვნულ მუზეუმის ფონდებში დაცული აფხაზეთთან დაკავშირებული ნივთები. მეცნიერების მრავალი თაობის მიერ მოპოვებულ და შესწავლილ მდიდარ მასალას თავი მოუყარა და გამოსაცემად მოამზადა ხელოვნებათმცოდნეობის დოქტორმა, დინარა ვაჩნაძემ. ნაშრომის მიზანია აფხაზეთის უმნიშვნელოვანესი ისტორიულ-კულტურული ძეგლების წარმოჩენა და პოპულარიზაცია. აღსანიშნავია, რომ წიგნი სამენოვანია- ქართული, აფხაზური და ინგლისური.

"საზოგადოება ივერიისა" და საქართველოს ეროვნული მუზეუმის თანამშრომლობის ფარგლებში გამოიცა ნაშრომი „შუა საუკუნეების საქართველოს ქრისტიანული ხელოვნების საგანძური“. წიგნში წარმოდგენილია მუზეუმში დაცული კოლექცია, ის უმდიდრესი მემკვიდრეობა, რომელიც მრავალსაუკუნოვანი ტრადიციებიდან მომდინარეობს. მაღალპოლიგრაფიულ დონეზე შესრულებული გამოცემა მკითხველს ახლოს აცნობს უძველეს ქრისტიანულ სახელმწიფოში მოღვაწე ოსტატთა მიერ შექმნილ საეკლესიო ხელოვნების ნიმუშებს. დიდი სახალხო ინტერესიდან გამომდინარე ყველასთვის ხელმისაწვდომია წიგნის ელექტრონული ვერსია. ის შეგიძლიათ იხილოთ „საზოგადოება ივერიისა“-ს ვებგვერდზე.