ღვთისმშობლის სავანე მახათას მთაზე, თავისი მნიშვნელობით, არის საერთო ეროვნული პროექტი, რომელშიც გაერთიანებულია მთელი საქართველო და საქართველოს კათალიკოს-პატრიარქის სიტყვებით „წმინდა სამების ტაძრის შემდეგ ეს არის ქართველი ხალხის მეორე ავტოპორტრეტი“. ამ პროექტში მონაწილეობა არის ქართველი ერის მადლიერების გამოხატულება ყოვლადწმინდა ღვთისმშობლისადმი, რომელიც არის ქართველთა განმანათლებელი და ქრისტიანული მოძღვრების შემომტანი საქართველოში. ამავე დროს, ჩვენ შეწევნას ვთხოვთ ყოვლადწმინდა ღვთისმშობელს, რომ ქართველ ერს კიდევ ერთხელ მისცეს უნარი ამ მოძღვრების სწორედ გააზრებისა.

რამდენადაც დღეს მხოლოდ ქრისტიანობაზე დაფუძნებულ ფასეულობათა სისტემას შეუძლია გახდეს თანამედროვე ქართული საზოგადოების გაზიარებული ფასეულობა, ამ პროექტში მონაწილეობით ერთობის შექმნას უდიდესი მნიშვნელობა აქვს.

მახათას მთაზე ღვთისმშობლის სავანის პროექტის ფარგლებში უკვე სრულდება ივერიის ყოვლადწმინდა ღვთისმშობლის ხატის სახელობის ტაძრის მშენებლობა და დაწყებულია ახალი ეტაპი, რომელიც ათონის მთაზე ქართველთა მონასტრის - ივერონის ანალოგიით, ითვალისწინებს აქ საგანმანათლებლო საქმიანობის წარმართვას. მოგეხსენებათ, რომ ივერონი იყო არამხოლოდ გამორჩეული სულიერი ცენტრი, არამედ ძალიან მნიშვნელოვანი კულტურულ-საგანმანათლებლო კერაც. სწორედ ივერონმა განაპირობა დიდწილად  ქართული იდენტობის შენარჩუნება.

ცხადია, რომ 21-ე საუკუნის საგანმანათლებლო ცენტრს ის ფორმები სჭირდება, რომლითაც კომუნიკაცია უფრო ადვილი და გასაგებია თანამედროვე ადამიანისთვის. ამიტომ, ამ ეტაპზე გადაწყდა, რომ საგანმანათლებლო საქმიანობის ინფრასტრუქტურული ცენტრი იქნება მუზეუმი, რომლის ბაზაზეც მოხდება საგანმანათლებლო საქმიანობა.

ამ მუზეუმში უმაღლესი საერთაშორისო სტანდარტების დაცვით იქნება წარმოდგენილი, მართული და დაცული ჩვენი ეროვნული მემკვიდრეობის გარკვეული ნიმუშები. აქ დაცული საექსპოზიციო არტეფაქტების ნაწილი დამატებით საღვთისმსახურო ფუნქციასაც შეიძენს და გახდება  ღვთისმშობლის სავანის ნაწილი. 

რამდენადაც ამ მუზეუმის ერთ-ერთი მთავარი აქცენტი გადატანილი იქნება საგანმანათლებლო საქმიანობაზე, აქ განთავსდება აუდიტორიები ლექციებისთვის, იქნება ბავშვთა განათლების სპეციალური ცენტრი, შეხვედრების ადგილი, ბიბლიოთეკა და ა.შ. ამ ცენტრში ადამიანებს შეეძლებათ მოისმინონ ლექციები ღვთისმეტყველებაში, ფილოსოფიასა და ისტორიაში, მიიღონ ინფორმაცია და ისაუბრონ ფასეულობების შესახებ. აქ იქნება რელიგიისა და მეცნიერების, რელიგიისა და კულტურის შეხვედრის ადგილი. 

გარდა უშუალოდ მუზეუმისა, „საზოგადოება ივერიისა“-ს  მიერ უკვე დაფუძნდა გიორგი მთაწმინდელის სახელობის მთარგმნელობითი ინსტიტუტი.  მთარგმნელობითი ინსტიტუტის ფუნქცია იქნება ნიჭიერი მთარგმნელების გამორჩევა და დაფინანსება, ასევე საღვთისმეტყველო, ფილოსოფიისა და ისტორიის სფეროებში განსაკუთრებული თარგმანების დაფინანსება.

როგორც მოგეხსენებათ, აღნიშნული სავანე 2010 წლიდან მთელი საქართველოს და უცხოეთში მცხოვრები ჩვენი თანამემამულეების შემოწირულობებით შენდება. დღეისათვის 68,000 ადამიანი არის ყოველთვიურად თანხის შემომწირველი და  მილიონზე მეტი კი ტაძრის აღმშენებელი (ანკეტებში მოხსენიებული ცოცხალი და გარდაცვლილი ადამიანები). 

ამ პროექტის ინფრასტრუქტურის მშენებლობა მიმდინარეობს თქვენს მიერ გაღებული შემოწირულობებით: დასასრულს უახლოვდება ტაძრის ძირითადი სამშენებლო სამუშაოები  და იწყება საგანმანათლებლო ინფრასტრუქტურის მშენებლობა, ასევე საგანმანათლებლო და მთარგმნელობითი საქმიანობის დაფინანსება და სხვ.

2016 წლის ხარჯებისა და შემოსავლების შესახებ აუდირებული ფინანსური შედეგების ანგარიში, ასევე პროექტის მიმდინარეობის ყველა ასპექტის შესახებ ინფორმაცია შეგიძლიათ იხილოთ ჩვენს ვებგვერდს www.iveriisa.ge.

ჩვენთვის უმნიშვნელოვანესია თქვენი მხარდაჭერა!