Notice: Undefined variable: UB in /home/iveriisag/domains/iveriisa.ge/public_html/libs/Functions.php on line 598 Notice: Undefined variable: UB in /home/iveriisag/domains/iveriisa.ge/public_html/libs/Functions.php on line 612

ღვთისმშობლის სავანე მახათას მთაზე

ყოვლადწმინდა ღვთისმშობლის წილხვდომილობამ ოდითგანვე განუსაზღვრა ქართველ ერს უდიდესი პასუხისმგებლობა, ყოფილიყო ერთგული ჭეშმარიტი სარწმუნოებისა. ქართველი ერის ისტორიაც სწორედ ჭეშმარიტების სიყვარულისა და მისი დაცვისათვის თავგანწირვის ისტორიაა.

საეკლესიო გადმოცემით, მაცხოვრის ამაღლების შემდეგ მოციქულებმა წილი ყარეს, თუ ვის რომელ ქვეყანაში უნდა ექადაგა სახარება. ზეციურ დედოფალს წილად ხვდა ივერიის ქვეყანა, ანუ საქართველო. უფლის ბრძანებით, დედა ღვთისა დარჩა იერუსალიმში, ხოლო საქართველოში წარმოგზავნა მოციქული ანდრია პირველწოდებული და თან გამოატანა თავისი ხელთუქმნელი ხატი, რომელსაც შემდგომში აწყურის ღვთისმშობელი ეწოდა. ასევე უფალმა ბრძანა, რომ ეს ხატი იქნებოდა ღვთისმშობლის წილ, ანუ მის ნაცვლად მცველი ჩვენი ერისა ვიდრე უკუნისამდე ჟამთა.

დროთა განმავლობაში ღვთისმშობელმა, თავისი მფარველობის დასტურად, კიდევ ერთი უდიდესი სიწმინდე არგუნა ივერიელთ - ღვთისმშობლის ხატი, რომელიც სასწაულებრივად განერიდა ბიზანტიის იმპერიაში ხატმებრძოლთა დევნას და ასევე სასწაულებრივად მიბრძანდა ათონის მთაზე, ივერთა მონასტერში. ამ ხატს ეწოდა ივერიის ღვთისმშობელი და დაეკისრა აწყურის ხელთუქმნელი ხატის  მსგავსი მისია   -დაეცვა მართლმადიდებლობა, ამჯერად უკვე ათონის მთაზე, ვიდრე აღსასრულამდე სოფლისა. ამ სიწმინდის ზღვიდან გამობრძანების პატივი ღვთისმშობელმა წილად არგუნა ივერიელთა მონასტერში სიწმინდით გამორჩეულ ბერ გაბრიელს.

ათონის ივერთა მონასტერმა იტვირთა უდიდესი მისია, ყოფილიყო არა მხოლოდ სულიერი მოღვაწეობის ცენტრი, არამედ მძლავრი კულტურულ-საგანმანათლებლო კერა უცხოეთში. მან მნიშვნელოვანი როლი შეასრულა ქრისტიანობის, როგორც საქართველოს ცივილიზაციური არჩევანისა და ქართული სახელმწიფოებრიობის განმტკიცების ხელშეწყობის საქმეში და დიდად განაპირობა ქართველთა ეროვნული იდენტობის შენარჩუნება. „ივერონი“ საქართველოსათვის იქცა ხიდად ქვეყნის წარსულსა და მომავალს შორის, რათა ქართულ ერთობას შეენარჩუნებინა ჭეშმარიტი რწმენა და დაეცვა ეროვნული ღირებულებები.

სამწუხაროდ, დროთა განმავლობაში, ჩვენივე ცოდვების გამო, ვერ შევძელით შეგვენარჩუნებინა წმინდა სავანე ათონის მთაზე. თუმცა სინანული, რომელიც თავისი სულიერი წინამძღოლის დაუღალავი შრომით ქართველმა ერმა გამოავლინა, უნაყოფო არ ყოფილა. ამ სინანულის ქმედითი გამოვლინებაა ელიას მთაზე საქართველოს მართლმადიდებელთა ერთსულოვნებით წმინდა სამების საკათედრო ტაძრის აშენება და ასევე, მთელი ერის ძალისხმევით მახათას მთაზე ყოვლადწმინდა ღვთისმშობლის ახალი სავანის მშენებლობა, რომელიც იქნება ღვთისმშობლის წილხვდომილი ერის მიერ ღვთის წინაშე საკუთარი პასუხისმგებლობის გათავისება და აღიარება.

საზოგადოება ივერიისა“