Warning: Undefined variable $UB in /home/iveriisag/domains/iveriisa.ge/public_html/libs/Functions.php on line 598

Warning: Undefined variable $UB in /home/iveriisag/domains/iveriisa.ge/public_html/libs/Functions.php on line 612

Warning: Undefined array key 0 in /home/iveriisag/domains/iveriisa.ge/public_html/libs/Functions.php on line 614
„საზოგადოება ივერიისა“-ს 2020 წლის გეგმების შესახებ

მახათას მთაზე დაიწყო ღვთისმშობლის სავანის კომპლექსის მშენებლობის მეორე ეტაპი. ამ ეტაპზე გათვალისწინებულია მონასტრისა და ივერიის ყოვლადწმინდა ღვთისმშობლის ხატის სახელობის ტაძრის მიმდებარე ტერიტორიაზე თანამედროვე და უმაღლესი საერთაშორისო სტანდარტების შესაბამისი, სამეცნიერო-კვლევითი და კულტურულ-საგანმანათლებლო ცენტრ-მუზეუმის მშენებლობა, რომელსაც 2019 წლის 8 მაისს საქართველოს მთავრობის, საქართველოს სამოციქულო ავტოკეფალური მართლმადიდებელი ეკლესიისა და „საზოგადოება ივერიისა“-ს მიერ ხელმოწერილი ურთიერთთანამშრომლობის მემორანდუმის შესაბამისად, საქართველოს სახელმწიფო, ეკლესია და საზოგადოება ერთობლივად განახორციელებს.

მემორანდუმის შესაბამისად, „საზოგადოება ივერიისა“-მ 2019 წლის 10 ივნისს გამოაცხადა საერთაშორისო არქიტექტურული კონკურსი მუზეუმის (წინასწარი სამუშაო სახელით „საქართველოს ქრისტიანული კულტურის ცენტრი“)პროექტის კონცეპტუალური დიზაინის შესაქმნელად. საკონკურსო წინადადებების მიღება დასრულდა 31 ივლისს. ინტერესი გამოხატა ოთხმა კომპანიამ. საკონკურსო კომისიამ, რომელიც დაკომპლექტებული იყო საქართველოს მთავრობის, საქართველოს სამოციქულო ავტოკეფალური მართლმადიდებელი ეკლესიისა და ა(ა)იპ „საზოგადოება ივერიისა“-ს წარმომადგენლებისაგან, მოწვეული ექსპერტების რეკომენდაციების საფუძველზე, კონკურსში გამარჯვება მიანიჭა „აინდა არქიტექტურა“-ს (პორტუგალია) მიერ წარმოდგენილ პროექტს. „საზოგადოება ივერიისა“-მ სრულად დააფინანსა საერთაშორისო არქიტექტურულ კონკურსში გამარჯვებული პროექტის კონცეპტუალური დიზაინი.

2020 წელს დაგეგმილია მუზეუმის მშენებლობისთვის თანხების მოზიდვის კამპანიის დაწყება, რომელიც შემოწირულობებთან ერთად, ასევე, ითვალისწინებს სახელმწიფოს მონაწილეობას. ამ საერთო ეროვნულ პროექტში ჩართული თითოეული ადამიანის როლი უმნიშვნელოვანესია მისი წარმატებისთვის!

2020 წელს „საზოგადოება ივერიისა“ გეგმავს ამ მუზეუმისთვის საზოგადოებრივი განათლების პროექტზე მუშაობის დაწყებას. ეს იქნება ფასეულობითი საგანმანათლებლო პროგრამები, სადაც ნაჩვენები იქნება საქართველოს ეროვნული მსოფლმხედველობისა და ფასეულობების ჩამოყალიბების გზა, საქართველოს არსი და ადგილი ცივილიზაციათა სისტემაში და ქრისტიანობის განმსაზღვრელი როლი ქართული ნაციონალური და კულტურული იდენტობის  ჩამოყალიბების საქმეში.

 

„საზოგადოება ივერიისა“, ასევე, ახორციელებს ტაძრის შიდა სივრცისა და გარე ტერიტორიის კეთილმოწყობის სამუშაოებისა და მონასტრის მოვლა-შენახვის მიმდინარე ხარჯების დაფინანსებას.