ღვთისმშობლის სავანის მშენებლობის მოკლე ისტორია

2002 წელს მისმა უწმინდესობამ და უნეტარესობამ, სრულიად საქართველოს კათოლიკოს-პატრიარქმა ილია II–მ დააფუძნა „ივერიის ღვთისმშობლის ხატის სამონასტრო კომპლექსის მშენებლობის ფონდი“, რომელსაც მახათას მთაზე უნდა განეხორციელებინა ტაძრისა და სამონასტრო კომპლექსის მშენებლობა. ამ ფონდს მისი უწმინდესობის ლოცვა-კურთხევით 2002 წელს სათავეში ჩაუდგა ბატონი გია ყარყარაშვილი. ფონდმა საქმიანობა დაიწყო ათონის ივერთა მონასტრის ქტიტორების – იოანე, ექვთიმე და გიორგი მთაწმინდელების ტაძრის მშენებლობით, რომლის საძირკველიც 2005 წელს აკურთხა სრულიად საქართველოს კათოლიკოს–პატრიარქმა ილია II-მ. საძირკვლის კურთხევაში მონაწილეობა მიიღო ათონის მთის სხვადასხვა მონასტრიდან ჩამოსულმა 13 ბერმა. მათ ტაძრის საძირკველში ჩააყოლეს ივერიის მონასტრის მიწა და სიწმინდეები სხვა მონასტრებიდან.  ათონელი მამების - იოანეს, ექვთიმესა და გიორგის ტაძრის მშენებლობა დასრულდა 2006 წლის 18 ოქტომბერს. ფონდის წევრები ყოველწლიურად მოილოცავდნენ წმინდა მთას, რათა ივერიის ღვთისმშობლისა და ათონის სხვა სასწაულთმოქმედი ხატების მეოხებით მახათას მთაზე დაწყებული მშენებლობა ღვთის სათნოდ წარმართულიყო. ფონდის დაკვეთით ათონის მთაზე დაიწერა და საქართველოში ჩამობრძანდა სასწაულთმოქმედი ხატების ასლები: ღვთისმშობლისა (მსწრაფლშემსმენელი, სამხელა, ღირს არსი), წმინდა გიორგისა და ივერონის ქტიტორების – იოანე, ექვთიმე და გიორგი მთაწმინდელებისა.

2010 წელს მისი უწმინდესობის ლოცვა-კურთხევით, ივერიის ღვთისმშობლის ხატის ტაძრისა და სამონასტრო კომპლექსის მშენებლობის პროცესში ჩაერთო სრულიად საქართველო და შეიქმნა ფონდი „ივერიისა“. ამ საქმის ახალი ეტაპის ხელმძღვანელობა დაევალა ბატონ პაატა ბურჭულაძეს. 2016 წლიდან, მისი უწმინდესობის ლოცვა-კურთხევით, ფონდის საქმიანობას სათავეში ჩაუდგა ბატონი გიორგი თავაძე, რომელიც 2002 წლიდან იყო ფონდის სამეთვალყურეო საბჭოს წევრი.

ივერიის ღვთისმშობლის ხატის მშენებარე ტაძრის, კარიბჭისა და სამონასტრო კომპლექსის პროექტის ავტორი და მთავარი არქიტექტორი გახლავთ ბატონი ომარ ნაფეტვარიძე, ხოლო იოანეს, ექვთიმესა და გიორგი მთაწმინდელების უკვე აშენებული ტაძრის პროექტის თანაავტორია ბატონი რევაზ ჯანაშია. 

ივერიის ღვთისმშობლის ხატის ტაძრის საძირკველი იკურთხა 2011 წლის 21 სექტემბერს. პატრიარქის ლოცვა-კურთხევით, ათასობით ადამიანმა საქართველოს სხვადასხვა კუთხიდან ტაძრის საძირკველში ჩასაბრძანებლად მიიტანა ქვები, რომლებზეც მათი ოჯახის წევრების სახელები იყო დაწერილი. მშენებლობა დაიწყო 2012 წელს. 2015 წლის 21 სექტემბერს ტაძარზე აღიმართა ჯვარი. 2016 წლის მაისში ტაძრის სამრეკლოზე საქართველოში ჩამოსხმული ზარები დაიკიდა.

2016 წლის აპრილში მშენებარე ტაძრისათვის, ფონდის დაკვეთით, ათონის მთაზე დაიწერა და საქართველოში ჩამობრძანდა ივერიის ყოვლადწმინდა ღვთისმშობლის ხატის ასლი და საგანგებოდ შექმნილი ღირსი მამა გაბრიელ ათონელის ხატი.

შესრულებული და მიმდინარე სამუშაოების შესახებ

2017 წლის 1 იანვრისათვის მთლიანად დასრულებულია ტაძრის, კარიბჭე-სამრეკლოთი და კოლონადით, წყალკურთხევის პავილიონის და ყველა ძირითადი დამხმარე ნაგებობის (ელექტროქვესადგური, საქვაბე, ჩილერების მოედანი, საზოგადოებრივი ტუალეტი, რკინაბეტონის გვირაბი, საყრდენი კედლები და სხვა) რკინაბეტონის კარკასული ნაწილები. ტაძრისა და კარიბჭის შენობების თავზე აღმართულია შესაბამისად 5,1მ და 2,5მ სიმაღლის, თითბერისაგან ჩამოსხმული ჯვრები. სამრეკლოში ჩამოიკიდა 5 სხვადასხვა ზომის, ასევე თითბერისაგან ჩამოსხმული ზარი (3000კგ, 1600კგ, 800კგ, 400კგ და 200კგ).

     ამჟამად მიმდინარეობს ტაძრის გარე კედლების მოპირკეთება ბოლნისის ტუფის ქვით და შესრულებულია მთლიანი მოცულობის 60%-ზე მეტი.

    მიმდინარე წელს დაგეგმილია შემდეგი ძირითადი სამუშაოების შესრულება:

• ტაძრის გარე მოპირკეთების დასრულება;
• ტაძრის სპილენძის სახურავის მოწყობა;
• ტაძრის ალუმინის სარკმლების მოწყობა;
• ტაძრის შიგა ელექტროგაყვანილობის მოწყობა;
• ტაძრის ინტერიერის შელესვა (ბაზალტის ბოჭკოთი);
• ტაძრის იატაკის გათბობა ბეტონის მოჭიმვის მოწყობით;
• ტაძრის შესასვლელი კარებების მოპირკეთება თითბერის სხმულებით;
• ტაძრის გარშემო რკინაბეტონის ფილის დასრულება.

გარდა ამისა, ქ. თბილისის მერიას გათვალისწინებული აქვს ტაძრამდე მისასვლელი საქალაქო გზის მოწყობა, რომელიც უნდა დასრულდეს  2017 წლის სექტემბრამდე.