12 მაისს ღვთისმშობლის წილხვდომილობის დღე და ანდრია პირველწოდებულის ხსენების დღე აღინიშნება. დღესასწაულთან დაკავშირებით მახათას მთაზე ივერიის  ყოვლადწმინდა ღვისმშობლის  ხატის სახელობის ტაძარში წირვა-ლოცვა  საქართველოს კათოლიკოს-პატრიარქმა  ილია მეორემ აღავლინა.

"ეს არის უდიდესი სასწაული, ეს არის უდიდესი წყალობა ღვთისა. ჩვენ დღეს შევასრულებთ სამადლობელ პარაკლისს და მადლობას შევსწირავთ უფალს და ყოვლადწმინდა ღვთისმშობელს.  

ამისთვის იყო განჩინება დაწერილი ჩემ მიერ, რომ მთელი კვირა იქნება დღესასწაული წილხვდომილობისა. მთელი კვირის განმავლობაში ქართველი ერი იზეიმებს ამ დიდ დღესასწაულს. 

დალოცვილი იყავით, გაიხარეთ ორსავე სოფელსა შინა" - ბრძანა პატრიარქმა წირვის დასრულების შემდეგ. 

მახათას მთაზე მშენებარე ივერიის ყოვლადწმინდა ღვთისმშობლის ხატის სახელობის ტაძარი 2019 წლის 12 მაისს ღვთისმშობლის წილხვდომილობის დღესასწაულზე იკურთხა. დღევანდელ დღსასწაულს  ასევე მიეძღვნა ახალი უნიკალური ხატი ყოვლადწმინდა ღვთისმშობლისა - "ღვთისმშობლის წილხვედრი საქართველო". ივერიის ყოვლადწმინდა ღვთისმშობლის ხატის სახელობის ტაძარი გახლავთ მახათას მთაზე ღვთისმშობლის სავანის კომპლექსის ნაწილი, რომლის მშენებლობა პატქრიარქის ლოცვა კურთხევით 2002 წლიდან მიმდინარეობს. ღვთისმშობლის ტაძრის ამოქმედებით დასრულდა კომპლექსის მშენებლობის პირველი ეტაპი და დაიწყო მეორე, რაც მონასტრისა და ტაძრის მიმდებარე ტერიტორიაზე, საგანმანათლებლო ცენტრ-მუზეუმის მშენებლობას ითვალისწინებს. რომელსაც საქართველოს სახელმწიფო, ეკლესია და საზოგადოება ერთობლივად განახორციელებს.

იხილეთ ბმული

იხილეთ ბმული