2019 წლის 12 მაისს, 10 საათზე, ღვთისმშობლის წილხვდომილობის დღესასწაულზე, მახათას მთაზე იკურთხა ივერიის ყოვლადწმინდა ღვთისმშობლის ხატის სახელობის ტაძარი. საზეიმო წირვა აღავლინა საქართველოს კათოლიკოს-პატრიარქმა ილია II.

ივერიის ყოვლადწმინდა ღვთისმშობლის ხატის სახელობის ტაძარი გახლავთ მახათას მთაზე ღვთისმშობლის სავანის კომპლექსის ნაწილი, რომლის მშენებლობაც მისი უწმინდესის ლოცვა-კურთხევით 2002 წლიდან მიმდინარეობს. 

ეს კომპლექსი უნიკალურია თავისი მნიშვნელობით, რამდენადაც ის არის საერთო ეროვნული პროექტი, რომელშიც გაერთიანებულია მთელი საქართველო და საქართველოს კათოლიკოს-პატრიარქის სიტყვებით "წმინდა სამების ტაძრის შემდეგ ეს არის ქართველი ხალხის მეორე ავტოპორტრეტი". 

ღვთისმშობლის სავანის კომპლექსის ფარგლებში გათვალისწინებული ტაძრის და სამონასტრო კომპლექსის  მშნებლობასთან ერთად, ათონის მთაზე ქართველთა მონასტრის-ივერონის ანალოგიით, აქ განსაზღვრულია ასევე საგანმანათლებლო ცენტრის მშენებელობაც. როგორც ცნობილია, ივერონი იყო არამხოლოდ გამორჩეული სულიერი ცენტრი, არამედ ძალიან მნიშვნელოვანი კულტურულ-საგანმანათლებლო კერაც. სწორედ ივერონმა განაპირობა დიდწილად ქართული იდენტობის შენარჩუნება.

2010 წლიდან დღემდე მახათას მთაზე ღვთისმშობლის სავანის პროექტისათვის შემოწირულობა გაიღო 75,000 ადამიანმა. მათ მიერ მოხსენიებული ცოცხალი და გარდაცვლილი ადამიანების საერთო რაოდენობმა კი  1, 110,000-ია. თითოეული მათგანი, პატრიარქის კურთხევით, ტაძრის აღმშენებლად-ქტიტორად მოიხსენიება. 

ივერიის ყოვლადწმინდა ღვთისმშობლის ხატის სახელობის ტაძრის ამოქმედებით სრულდება ღვთისმშობლის სავანის კომპლექსის მშენებლობის პირველი ეტაპი. შემდეგი ეტაპი ითვალისწინებს მონასტრისა და ივერიის ყოვლდაწმინდა ღვთისმშობლის ხატის სახელობის ტაძრის მიმდებარე ტერიტორიაზე საგანმანათელბლო ცენტრ-მუზეუმის შენებლობას, რომელსაც საქართველოს სახელმწიფო, ეკლესია და საზოგადოება ერთობლივად განახორციელებს. 

იხილეთ ბმული

იხილეთ ბმული 

იხილეთ ბმული